2024 жылғы 15 мамыр күні Астана қаласы әкімдігінің «Әдістемелік орталығы» МКҚК елордалық мектепке дейінгі және орта білім беру ұйымдарына «Балақайлар мектебі» мектепалды даярлықтың қысқа мерзімді курстарын ұйымдастыру бойынша вебинар өткізді.
Вебинардың мақсаты – «Балақайлар мектебі» курстарын ұйымдастыру және енгізу мәселелері бойынша педагогтерге әдістемелік көмек көрсету, түсіндіру.
Жоспарға сәйкес Астана қаласының мемлекеттік мектептерінің бастауыш сынып мұғалімдері және балабақша педагогтері биыл мектеп табалдырығын аттағалы отырған 1-сынып бүлдіршіндерін білім ортасына бейімдеу үшін жазғы үш айда (маусым, шілде, тамыз) «Балақайлар мектебі» қысқа мерзімді даярлық курстарын жүргізеді. Курстарды оқыту жоспары ұлттық құндылықтарға негізделіп әзірленген және ойын түрінде іске асырылады.
Вебинарға мектептердің тәрбие ісі жөніндегі орынбасарлары, балабақша меңгерушілері, әдіскерлері барлығы 200-ден астам педагог қатысты.
«Балақайлар мектебі» курстарын ұйымдастыру бойынша жұмыс өз жалғасын табады.
