2025 жылдың 27-28 наурыз күндері Астана қаласы №59 мектеп-лицейінің базасында Астана қаласы әкімдігінің «Әдістемелік орталығы» МКҚК, IT және баспа бөлімінің ұйымдастыруымен, барлық білім беру ұйымдарының педагогтеріне арналған «Мобилография негіздері: STOP-motion және жарықтың тиімді қолданылуы» тақырыбында 2 күндік оқыту семинарын өткізді.
Семинардың негізгі мақсаты – Мұғалімдерге мобилографияның негіздері мен STOP-motion анимациясын жасау, сондай-ақ жарықпен жұмыс істеу дағдыларын меңгерту арқылы шығармашылық жобалар үшін қажетті практикалық білім мен дағдыларды ұсыну. Іс-шараға 38 педагог қатысты.
Семинар барысында қатысушылар телефон камерасын фото және видео түсіруге қалай баптауды үйренді. Сонымен қатар, видео түсіру кезінде дұрыс жоспарлау мен композицияны таңдау әдістері көрсетілді.
Семинарда кадрлар арасындағы өтулерді дұрыс жасау және қолдану туралы да айтылды. Қатысушылар табиғи және жасанды жарықпен жұмыс істеу дағдыларын меңгерді. Олар күннің қай уақытында сыртта түсірілім жасау тиімді болатынын және үйде тек табиғи жарықпен видео түсіруге болатынын білді. Сонымен қатар, жасанды жарық орнатудың және оның көмегімен сапалы кадрлар түсірудің қыр-сырлары көрсетілді.
Екінші күні қатысушылар Stop-motion эффектісін жасау әдістерін үйреніп, осы мақсатта қолданылатын қосымшамен танысты. Қосымшаның мүмкіндіктері мен лайфхактары көрсетілді. Сондай-ақ, видео монтажы үшін пайдалы телеграм-боттар таныстырылды.
Семинарға қатысқан мұғалімдер оқыту материалдарын жоғары бағалап, келесі болатын семинарларға қызығушылық танытты.
