Астана қаласы әкімдігінің «Әдістемелік орталығы» МКҚК ұйымдастыруымен 2025 жылғы 14 қарашада №32 мектеп-гимназиясында «Адал азамат тәрбиесі мен жасанды интеллект: қазақ тілі сабақтарындағы жаңа мүмкіндіктер» тақырыбында қалалық семинар өтті. Іс-шараға елордадағы жалпы білім беретін мектептердің «Қазақ тілі мен әдебиеті» (Т2) пәні бойынша 100-ге жуық мұғалім қатысты.
Семинардың мақсаты – қазақ тілі сабақтарында жасанды интеллект технологияларын тиімді қолдану арқылы оқушылардың тілдік құзыреттілігін және тұлғалық құндылықтарын қалыптастыру.
Іс-шара бағдарламасы бірнеше бағытты қамтыды:
– GEMINI, Storybook, NotebookLM секілді ЖИ құралдарын оқу үдерісіне кіріктіру жолдары;
– оқыту мазмұнын әр оқушының деңгейіне қарай бейімдеу және жекелеген білім траекторияларын құрастыру мүмкіндіктері;
– қазақ тілі сабақтарында ЖИ көмегімен тыңдалым, айтылым, жазылым және оқылым дағдыларын дамыту әдістері;
– «Адал азамат» бағытындағы құндылықтарды (адалдық, әділдік, жауапкершілік, азаматтық белсенділік) оқу-тәрбие үдерісіне енгізудің заманауи тәсілдері және оларды ЖИ құралдарымен қолдау мүмкіндіктері;
– академиялық адалдық пен оқушы тұлғасын тәрбиелеудегі жаңа педагогикалық тәсілдер;
– оқу жетістіктерін бағалау жүйесін жетілдіру және цифрлық педагогиканың әлеуетін пайдалану.
Семинар шеңберінде тәжірибелі педагогтер ашық сабақтар өткізіп, практикалық шеберлік сыныптарын ұйымдастырды. Қатысушылар интерактивті жаттығулар әзірлеу, оқу материалдарын автоматты түрде талдау, білім алушылардың жеке білім траекторияларын қалыптастыру сияқты ЖИ мүмкіндіктерімен тікелей жұмыс жасап көрді.
Семинар қорытындысында өткізілген рефлексиялық алаңда мұғалімдер:
– іс-шара барысында өздерінің кәсіби әлеуетін арттыруға мүмкіндік беретін құнды тәжірибе алғандарын;
– жасанды интеллект құралдарының оқу-тәрбие үдерісін жандандыруда және оқушылардың оқу мотивациясын көтеруде тиімді екендігін;
– мұндай кәсіби ортада өзара тәжірибе алмасу педагогтердің шығармашылық ізденісіне және кәсіби дамуына айтарлықтай серпін беретінін атап өтті.
Семинар қатысушылары ұйымдастырушыларға алғыстарын білдіріп, болашақта ЖИ технологияларын білім беру жүйесіне енгізуге бағытталған осындай мазмұнды іс-шаралардың жалғастырылуына ниет білдірді.
