2024 жылдың 9 қазан күні Астана қаласы әкімдігінің «Сервис және туризм колледжі» ШЖҚ МКК базасында «Үздік — 2024» қалалық байқауының салтанатты ашылуы өтті.
Мақсаты: жұмысшы мамандықтар мен кәсіптерінің маңыздылығы мен беделін арттыру, кәсіптік оқытудың озық тәжірибесін насихаттау, қаланың кәсіптік білім беру жүйесінде жұмысшы кадрларды даярлауға жұмыс берушілердің назарын бұру және түлектерді жұмысқа орналастыруға жәрдемдесу, жастарды Астана қаласы экономикасының нақты секторларына тарту.
Жыл сайын «Үздік – 2024» қалалық байқауы жастар арасында танымал болып келеді. Бұл жай ғана бәсекелестік емес, жұмысшы мамандықтарға деген көзқарасты өзгерту мен кәсіби шеберлікті дамыту үшін қолайлы орта құруға бағытталған ауқымды бастама.
Байқаудың салтанатты ашылуында қатысушыларды Астана қаласы Білім басқармасының Техникалық және кәсіптік білім беру бөлімінің басшысы Хон А.Р., Астана қаласы әкімдігінің «Астана жастары» жастар ресурстық орталығы» КММ бөлім басшысы Аймақ А.Н., «Талап» КеАҚ вице-президенті Елеусінова Б.О. құттықтады. Іс-шараға әлеуметтік серіктестер, Астана қаласы колледждерінің басшылары мен оқытушылары қатысты.
2024 жылғы 9 — 31 қазан аралығында Астана қаласындағы 10 колледждің алаңдарында 25 құзырет бойынша 375 қатысушы жарысатын болады, олар жас мамандар, колледж студенттері және 2024 жылғы WorldSkills қалалық чемпионатының жеңімпаздары.
Байқау еліміздің бәсекеге қабілеттілігі мен инновациялық дамуын қалыптастыруда үлкен рөл атқарады. Жобаның басты мақсаты табысты жұмысқа орналасу және сұранысқа ие жұмыс орындарын қамтамасыз ету екенін ескерсек, бұл жоба – еліміздің жас мамандарының мақсатқа бағытталған қозғалысы болмақ.
